യാത്രക്കാർ ശ്രദ്ധിക്കുക; ഹിജ്റ പുതുവർഷ അവധി പ്രമാണിച്ച് ദുബായിൽ പൊതുഗതാഗത സംവിധാനങ്ങൾക്ക് പുതിയ സമയക്രമം

ദുബായ്∙ ഹിജ്റ പുതുവർഷ (1448) അവധി പ്രമാണിച്ച് ദുബായിലെ പൊതുഗതാഗത സംവിധാനങ്ങളുടെയും അനുബന്ധ സേവനങ്ങളുടെയും പ്രവർത്തന സമയങ്ങളിൽ വരുത്തിയ മാറ്റങ്ങൾ റോഡ്സ് ആൻഡ് ട്രാൻസ്പോർട്ട് അതോറിറ്റി (ആർ.ടി.എ) പ്രഖ്യാപിച്ചു. ഉപയോക്തൃ സന്തുഷ്ടി കേന്ദ്രങ്ങൾ, പൊതു പാർക്കിങ്, മെട്രോ, ട്രാം, പൊതുബസുകൾ, മറൈൻ ട്രാൻസ്പോർട്ട്, വാഹന പരിശോധനാ കേന്ദ്രങ്ങൾ എന്നിവയുടെ പുതുക്കിയ സമയക്രമമാണ് അധികൃതർ പുറത്തുവിട്ടത്.

തിങ്കളാഴ്ച മെട്രോ റെഡ്, ഗ്രീൻ ലൈനുകൾ രാവിലെ 5 മുതൽ അർധരാത്രി 12 വരെ സർവീസ് നടത്തും. ദുബായ് ട്രാം രാവിലെ 6 മുതൽ പിറ്റേന്ന് പുലർച്ചെ 1 വരെയായിരിക്കും സർവീസ് നടത്തുക. പൊതുബസുകളുടെ പുതുക്കിയ സമയവിവരങ്ങൾ അറിയാൻ യാത്രക്കാർ 'സുഹെയ്ൽ' (S’hail) ആപ്പ് പരിശോധിക്കേണ്ടതാണ്.

അതേസമയം 13 മുതൽ 15 വരെ അൽ ഗുബൈബ ബസ് സ്റ്റേഷനിൽ നിന്ന് അബുദാബിയിലേക്കുള്ള ഇ100 ബസ് സർവീസ് ഉണ്ടായിരിക്കുന്നതല്ല. ഈ ദിവസങ്ങളിൽ അബുദാബിയിലേക്ക് യാത്ര ചെയ്യേണ്ടവർ ഇബ്ൻ ബത്തൂത്ത ബസ് സ്റ്റേഷനിൽ നിന്നുള്ള ഇ101 സർവീസ് ഉപയോഗപ്പെടുത്തണം. ജലഗതാഗത സർവീസുകളുടെ കൃത്യമായ സമയവിവരങ്ങൾ ആർ.ടി.എയുടെ ഔദ്യോഗിക വെബ്സൈറ്റ് വഴി ലഭ്യമാകും.

തിങ്കളാഴ്ച ആർ.ടി.എയുടെ എല്ലാ ഉപയോക്തൃ സന്തുഷ്ടി കേന്ദ്രങ്ങൾക്കും വാഹന പരിശോധനാ കേന്ദ്രങ്ങൾക്കും അവധിയായിരിക്കും. എന്നാൽ ഉമ്മു റമൂലിലെ കേന്ദ്രവും ദെയ്റ, അൽ ബർഷ, അൽ തവാർ, അൽ കിഫാഫ് എന്നിവിടങ്ങളിലെയും ആർടിഎ ആസ്ഥാനത്തെയും സ്മാർട്ട് കിയോസ്കുകളും പതിവുപോലെ 24 മണിക്കൂറും പ്രവർത്തിക്കും. അടച്ചിടുന്ന വാഹന പരിശോധനാ കേന്ദ്രങ്ങൾ ഉൾപ്പെടെയുള്ള ഓഫീസുകൾ 16 മുതൽ സാധാരണ നിലയിൽ പ്രവർത്തിച്ചുതുടങ്ങും.